Pedwar o gynlluniau ôl-osod tai mwyaf anarferol ac arloesol Cymru
![Pedwar o gynlluniau ôl-osod tai mwyaf anarferol ac arloesol Cymru](/cms-assets/featured-images/_content1400/Trivallis-school.jpg)
Mae cymdeithasau tai arloesol yng Nghymru yn addasu clwb nos, adeilad a arferai fod yn siop Woolworths a hyd yn oed dafarn i fod yn gartrefi newydd.
Fel gweddill y Deyrnas Unedig, mae Cymru yng nghanol argyfwng tai ar hyn o bryd. Felly, er mwyn sicrhau eu bod yn parhau i gyflawni eu diben craidd o ddarparu cartrefi fforddiadwy i’r bobl sydd eu hangen, mae cymdeithasau tai ar draws y wlad yn edrych ar ystod eang o gyfleoedd i adeiladu, datblygu a chyflenwi cartrefi.
Mae’r ymagwedd hon wedi gweld y sector yn canfod ffyrdd cynyddol greadigol i ôl-osod ac ailddatblygu adeiladau presennol i fod yn gartrefi ansawdd uchel, diogel a fforddiadwy. Dyma rai o’r cynlluniau ôl-osod mwy anarferol a diddorol y bu cymdeithasau tai yn gweithio arnynt.
![](/cms-assets/articles/_content1400/Biophilic-Living-Swansea-Aerial-view-2048x1365.jpg)
Cyn adeilad Woolworth
Cafodd datblygiad arloesol Biophilic Abertawe gan gymdeithas tai Pobl, sy’n cynnwys hen adeilad siop Woolworths ar Stryd Oxford yn Abertawe, ei gymeradwyo fel y cyntaf ym Mhrydain.
Bydd y datblygiad ‘adeilad byw’, a ddarperir gan Hacer Developments a Pobl, yn cynnwys tŵr 13-llawr newydd yn rhan o’r siop flaenorol, gan gynnwys waliau gwyrdd a thoeau gwyrdd, ynghyd â chyfleuster addysgol, manwerthu, swyddfeydd, buarth wedi ei dirlunio, paneli solar ar y to, storfa batris a gerddi.
Bydd hefyd gymysgedd o dai fforddiadwy a rhan-berchnogaeth ar y safle, gyda Pobl yn rheoli tua 50 o fflatiau fforddiadwy.
Ynghyd â hyn, bydd y datblygiad cynaliadwy yn cynnwys fferm drefol dros bedwar llawr gyda dau dŷ gwydr ar y to. Bydd gan y mwyaf ohonynt dechnoleg a ddatblygwyd gan Brifysgol Abertawe i gefnogi twf 4.5 tunnell fetrig o ffrwythau, llysiau, cynnyrch salad a pherlysiau bob blwyddyn.
![](/cms-assets/articles/_content1400/Trivallis-school.jpg)
Cyn ysgol Gymraeg
Mae Trivallis wedi ailddatblygu cyn ysgol Gymraeg yn Llantrisant yn 18 o gartrefi newydd fforddiadwy.
Mae datblygiad Llys y Tri Sant wedi gweld cyn adeilad yr ysgol yn cael ei gynnwys yn y cartrefi newydd, gyda wyth fflat un ystafell wely, chwe fflat dwy ystafell wely, byngalo wedi ei addasu a thri tŷ yn cael eu hadeiladu wrth ei ymyl.
Cafwyd cyllid ar gyfer y cynllun ôl-osod o Grant Tai Cymdeithasol Llywodraeth Cymru a Chyngor Bwrdeistref Sirol Rhondda Cynon Taf.
![](/cms-assets/articles/_content1400/Linc-nightclub.png)
Cyn glwb nos
Mae Linc Cymru yn ôl-osod cyn glwb nos Zanzibar yng Nghasnewydd yn 37 fflat fforddiadwy.
Cafodd y cymdeithas tai ganiatâd cynllunio i drawsnewid y clwb poblogaidd yn llety un a dwy ystafell wely ar gyfer tenantiaid. Bydd y llety yn canolbwyntio ar gynaliadwyedd, gyda phaneli solar ar bob cartref a gaiff eu hadeiladu yn defnyddio dull ffabrig-yn-gyntaf.
Prynodd Linc Cymru yr adeilad, a fu hefyd yn eglwys yn flaenorol, yn 2020 ar ôl i dân achosi difrod iddo yn 2018.
![](/cms-assets/articles/_content1400/Seaview-Newydd.jpg)
Hen dafarn S.A Brains
Mae cymdeithas tai Newydd wedi dod yn gyfrifol am 28 cartref yng nghyn dafarn Brains yng Ngwesty’r Seaview yn y Barri.
Er mwyn cwblhau’r cynllun ôl-osod hwn a thrawsnewid y gyn dafarn i fod yn dai fforddiadwy, bu’r gymdeithas tai yn gweithio mewn partneriaeth gyda Chyngor Bro Morgannwg a chafodd gymorth o Raglen Grant Tai Cymdeithasol Llywodraeth Cymru.
Dechreuodd y gwaith adeiladu yn 2021, dan arweiniad Sterling Construction o Crosshands, ac mae’r llety newydd yn awr yn croesawu tenantiaid.
Mae Cartrefi Cymunedol Cymru yn cynrychioli 34 cymdeithas tai nid-er-elw yng Nghymru, sy’n darparu bron 165,000 o gartrefi ar gyfer 10% o boblogaeth Cymru.
Gyda’n gilydd, ein gweledigaeth yw gwneud Cymru yn wlad lle mae cartref da yn hawl sylfaenol i bawb.
Ar gyfer ymholiadau’r cyfryngau cysylltwch â Gemma Gwilym ar gemma-gwilym@chcymru.org.uk