Sut mae Cymdeithas Tai Dewis Cyntaf yn helpu tenantiaid sydd ag anghenion ychwanegol

Mae Cymdeithas Tai Dewis Cyntaf yn cefnogi tenantiaid gydag anableddau, cyn aelodau o’r lluoedd arfog a phobl gydag anghenion cymhleth ychwanegol,. Mae’r argyfwng costau byw yn gymhleth gyda llawer o wybodaeth yn dod gan Lywodraeth y Deyrnas Unedig a Llywodraeth Cymru.

Yma mae Donna Jones, cyfarwyddwr gwasanaethau corfforaethol Dewis Cyntaf, yn sôn am eu dull o gefnogi a chyfathrebu gyda’u cwsmeriaid sydd ag anghenion ychwanegol ac a all fod angen help ychwanegol i ddeall yr wybodaeth.

C: Faint o denantiaid sydd gennych chi ac ym mha fathau o lety?

Donna: Mae gennym 822 tenant ar hyn o bryd yn byw mewn 379 annedd, gyda chymysgedd o Byw â Chymorth, Hygyrch ac Anghenion Cyffredinol.

C: Pa anghenion ychwanegol sydd gan eich tenantiaid?

Donna: Mae gan ein tenantiaid ystod eang o anghenion. Rydym yn bennaf yn darparu llety i bobl gydag anableddau dysgu mewn lleoliad byw â chymorth o fewn y gymuned a hefyd anheddau hygyrch ar gyfer pobl sy’n byw gydag anabledd corfforol. Yn ogystal â hyn, rydym yn darparu anheddau hygyrch a chartrefi anghenion cyffredinol ar gyfer pobl sydd â chysylltiad â’r lluoedd arfog. Gweithredwn mewn 19 awdurdod lleol yng Nghymru yn ogystal ag yn Swydd Amwythig a Telford yn Lloegr.

C: Sut wnaethoch chi addasu eich gwasanaethau i wneud yn siŵr fod tenantiaid yn gwybod eich bod yno i’w cefnogi?

Donna: Gyda’r cynnydd diweddar mewn costau byw a’r pandemig, rydym wedi darparu nifer o wasanaethau cymorth i helpu tenantiaid a allai fod angen cymorth.

● Mae gennym gronfa arian cyfatebol i helpu tenantiaid ostwng eu hôl-ddyled rhent. Byddwn yn cyfateb eu taliadau.

● Rydym wedi cyflwyno cronfa caledi ar gyfer pobl na all fforddio talu eu biliau.

● Dosbarthwyd taflen costau byw yn cyfeirio at y gwasanaethau sydd ar gael yn yr ardal. Roedd hyn yn cynnwys yr hyn y gallai tenantiaid ei wneud, yr hyn y gall Dewis Cyntaf ei wneud a’r hyn y gall awdurdodau lleol ei wneud i helpu.

● Anfonwyd mwy o ohebiaeth benodol ar gostau byw yn rhoi gwybodaeth debyg i’r daflen a nodir uchod ond gyda mwy o fanylion – biliau cyfleustod ac yn y blaen.

● Fe wnaethom gynnal sgyrsiau wyneb yn wyneb a rhithiol ar yr argyfwng costau byw yn ein digwyddiadau trafod tenantiaid a gyflwynwyd i 60 tenant ar draws y wlad, gyda chyfres arall o ddigwyddiadau ym mis Tachwedd yng Nghaerdydd a’r Drenewydd.

C: Mae llawer o landlordiaid yn defnyddio cyfryngau digidol. Beth mae eich cwsmeriaid yn ddweud wrthych am y ffordd sydd orau ganddynt glywed gennych?

Donna: Rydym yn cynnal arolygon tenantiaid yn rheolaidd i sicrhau ein bod yn cadw ansawdd ein gwaith ac i wirio fod gennym y dull cywir o gyfathrebu ar gyfer ein tenantiaid. Pan ofynnwyd iddynt beth yw eu hoff ddull cyfathrebu, dywedodd 12% o denantiaid y byddent yn hoffi cyfathrebu ar-lein yn ogystal â dros y ffôn neu drwy lythyr. Rydym wedi cynyddu ein cyfathrebu ar-lein yn ddiweddar, yn ogystal â rhoi newyddion drwy lythyrau neu’r cylchlythyr rheolaidd. Mae’r holl wybodaeth hefyd ar gael ar ein gwefan a sianeli cyfryngau cymdeithasol. I annog cynhwysiant digidol gyda thenantiaid, buom yn gweithio gyda Cymunedau Digidol Cymru i ddarparu 207 darn o dechnoleg ar gyfer tenantiaid. Gobeithio y bydd y prosiect cynhwysiant digidol yn cynyddu nifer o denantiaid a hoffai gyfathrebu gyda Dewis Cyntaf mewn dull digidol.

C: Fedrwch chi rannu unrhyw wersi o’ch gwaith dros y ddwy flynedd ddiwethaf drwy’r pandemig a’r argyfwng costau byw am gefnogi pobl gydag anghenion ychwanegol. Sut mae rhoi sicrwydd iddynt mewn cyfnod mor heriol?

Donna: Fe wnaethom gynnal y Prosiect Cynhwysiant Digidol yn ystod y pandemig i helpu rhoi dulliau cyfathrebu i denantiaid a fyddai fel arall yn methu siarad gyda pherthnasau a ffrindiau. Fe wnaeth Dewis Cyntaf helpu tenantiaid i ailgysylltu gyda’u cymunedau lleol drwy eu galluogi i fynychu dosbarthiadau a digwyddiadau cymunedol tebyg i yoga, apwyntiadau meddyg a grwpiau Pobl yn Gyntaf. Daeth un tenant hyd yn oed yn DJ ar-lein yn defnyddio eu iPad ar gyfer disgo cymunedol rhithiol.

Cynhaliodd Dewis Cyntaf nifer o ddigwyddiadau ar-lein i gysylltu gyda thenantiaid a deall eu hanghenion yn ystod y cyfnod hwn. Roedd y rhain yn cynnwys: .

● Trafod Tenantiaid a Phaneli – trafod costau byw, troseddau casineb a gosod rhent. Cafodd y rhain eu cynnal yn rhithiol i sicrhau parhad yn ystod y pandemig.

● Discos Tenantiaid – dan ofal Nigel, ein Rheolwr Tai, fe wnaeth ein discos rheolaidd Pasg, Calan Gaeaf a Nadolig barhau o gysur cartrefi tenantiaid yn defnyddio’r dyfeisiau a ddarparwyd iddynt.

Fe wnaethom hefyd gynnig cefnogaeth ac arweiniad parhaol ar dechnoleg gwybodaeth gan yr elusen ddigidol, Cymunedau Digidol Cymru.