Y Gymraes gyntaf i ddringo Everest a newyddiadurwraig wobrwyol i annerch Un Gynhadledd Fawr boblogaidd Cartrefi Cymunedol Cymru
Bydd Tori James, y Gymraes gyntaf i ddringo Everest, a’r newyddiaduwraig wobrwyol Sarah Dickins yn annerch cannoedd o arweinwyr cymdeithasau tai Cymru mewn cynhadledd bwysig yr haf hwn.
Bydd yr anturiaethwraig broffesiynol Ms James a Ms Dickins, sy’n gyn ohebydd gyda’r BBC, yn ymddangos yn Un Gynhadledd Tai Fawr Cartrefi Cymunedol Cymru ar 4 a 5 Gorffennaf.
Cynhelir y gynhadledd yng Ngwesty’r Mercure yng Nghaerdydd a bydd yn dod â phobl a sefydliadau allweddol o bob rhan o sector tai Cymru ynghyd i drafod sut y gallant gefnogi cymdeithasau tai a thenantiaid a datblygu gwasanaethau tai ar draws Cymru.
Yn ystod y digwyddiad deuddydd eleni, bydd siaradwyr yn trafod ôl-osod cartrefi presennol i ateb y galw cynyddol am dai, datgarboneiddio a sero net, adeiladu cartrefi fforddiadwy a diogelu’r amgylchedd, a darparu cartrefi ansawdd uchel.
Mae Ms Dickins a Ms James ymysg llu o siaradwyr, aelodau panel ac arbenigwyr diwydiant fydd yn rhannu eu profiadau dros y ddau ddiwrnod.
Fel prif siaradwraig bydd Ms Dickins, a fu’n ohebydd economeg y BBC am 10 mlynedd, yn trafod y rhagolygon economaidd, yr hyn mae’n ei olygu i Gymru, y sector tai cymdeithasol ac uchelgeisiau sero net.
Dywedodd y gyn newyddiadurwraig, a adawodd y BBC i ddod yn ymgynghorydd ar economeg gynaliadwy: “Rwy’n edrych ymlaen yn fawr iawn at siarad yn y digwyddiad. Rwy’n credu fod Cartrefi Cymunedol Cymru a’r sector yn wirioneddol hanfodol yn y newidiadau y bydd yn rhaid i bawb ohonom eu gwneud yn nhermau dod yn fwy cynaliadwy, cefnogi’r pontio yn nhermau sut mae’n effeithio ar gyflogwyr a thenantiaid a’r newidiadau y bydd angen i ni ymdopi â nhw yn yr ychydig flynyddoedd nesaf.
“Mae gan Cartrefi Cymunedol Cymru rôl bwysig yn nhermau defnyddio mesurau sy’n ein helpu i ymdopi, tebyg i baneli solar, a hefyd helpu pobl i arfer gyda’r syniad y byddwn yn byw mewn byd gwahanol.”
Bydd ei chyd brif siaradwraig Ms James, a ddaeth y Gymraes gyntaf i ddringo Everest yn 25 oed, yn trafod gwytnwch ar gyfer pobl a thimau mewn cyfnodau anodd.
Dywedodd seren rhaglen On Top of the World, rhaglen deledu am ei halldaith a’i champau dringo: “Rwyf wrth fy modd i fod yn siarad yn Un Gynhadledd Fawr Cartrefi Cymunedol Cymru. Byddaf yn rhannu fy mhrofiadau o rai o’r amgylcheddau mwyaf eithafol ac anodd o amgylch y byd.
“Byddaf yn edrych ar yr hyn sydd angen i fod yn dîm perfformiad uchel, cyflawni dan bwysau a datblygu gwytnwch ar gyfer yr hirdymor.”
Wrth siarad am y gynhadledd dywedodd Stuart Ropke, prif weithredwr Cartrefi Cymunedol Cymru, ei fod yn argoeli bod yn ddigwyddiad llwyddiannus arall.
Dywedodd: “Dros y blynyddoedd mae ein Un Cynhadledd Fawr wedi dod yn rhan hanfodol o’r calendr digwyddiadau tai, a rydym yn falch i fedru dod â’r sector ynghyd eto yn y ffordd wirioneddol effeithol yma.
“Mae’r gynhadledd yn ofod gwerthfawr tu hwnt lle gall arweinwyr cymdeithasau tai a phobl allweddol ddod ynghyd i drafod y materion mawr, rhannu eu syniadau a chydweithio i wneud gwahaniaeth i’r sector tai sy’n esblygu yng Nghymru.
“Edrychwn ymlaen at weld yr holl gymdeithasau tai sy’n aelodau o Cartrefi Cymunedol Cymru, ein partneriaid, gwesteion a siaradwyr, am yr hyn sy’n edrych fel blwyddyn gofiadwy arall.”
I brynu tocynnau ar gyfer yr Un Gynhadledd Fawr ewch i wefan Cartrefi Cymunedol Cymru neu ganfod mwy am Cartrefi Cymunedol Cymru a chymdeithasau tai yng Nghymru ewch i https://chcymru.org.uk/
Ar gyfer ymholiadau’r wasg neu’r cyfryngau anfonwch e-bost at media@chcymru.org.uk